مین بیر گئجه: آشاغیداکی اؤیکو، "لاپ او اوزاقلاردا" کیتابیندا گئتمیشدیرسه ده، سایین "ابراهیم عادلنیا"نین یئنیجه یازدیغی تنقیدینه گؤره یئنه سیزین قارشینیزدادیر.
هؤرولموش خاطيرهلر، من و آتام
رضا کاظمی
هر نه، آتامين ساققاللي يولداشينين ائويميزه گلديييندن سونرا باشلاندي. كيشي بارداشيني قوروب باشيني آشاغي سالميشدي. ائله تور توزلو دؤيوش پالتارييلا دوروب گلميشدي. آتامين تركشله اؤلدورولمهسيندن دئدي. سنگرداشينين يانيندا اوتورموش، خاطيره تعريفلهييرميش. قومپارا نئچه متير اويانليق پارتلاييب، تركشلرينين بيري دوشور آتامين سؤيلهدييي خاطيرهلري اورتاسينا. آنام اينانمادي. اؤزونو چادرايا بوكدويو حالدا، آياغا قالخيب چاي گتيرمك اوچون مطبخه ساري گئتدي. هئچ زاد دا دئمهدي. يالنيز، ايستيكاني دولدورا دولدورا مندن قند قابينين يئريني سوروشدو. قونشو قادينلاري، هاميسي قارا گئيينيب سيرايلا اوتاقلاريميزا دولوردولار. آنام ائو پالتارييلا او يان بو يانا يورويوردو، قندقابيلاري دولدوروردو. آروادلار نه قدَر اونا ياس كؤينهيينين گئيمهسيني يالوارديلار، گئيمهدي. اونلارين قاباغينا چاي توتا توتا، گؤزلرينين ايچينه دونوخوردو. منه دئييردي، آتان، سون مكتوبوندا بو تئزليييه قاييتماسيندان يازميش. يولداشلارينين بيري دئدي، ائله رحمتليك سيزه مكتوب يازا يازا شهيد اولدو. قومپارا باشيني قوپاردي، قورتارماميش مكتوبونو دا يئل آپاردي. هر نه توز تورپاق ايچينده ايتدي، باجي. قادينلار اوخشاما اوخوماغا باشلاديلار، باشباشا وئريب آغلاشديلار. آتامين اوچ اولدوزو وار ايدي. دؤيوشه يوللانان گونو، آنام سليقه ايله اوتولهدييي نيظامي پالتارلاريني گئيميش، اولدوزلاري ايسه پار پار پاريلداييردي. دوستلارينين پالتارلاري آنجاق، هئچواخت اوتولَنمهميش. اونلار هر دفعه بيزه باش چكديكده، گؤزلريني خالچانين اورتاسينا تيكير، هميشه ده آتامين نئجه شهيد اولدوغوندان دانيشيرديلار. بيري آتامين سيقار چكدييي حالدا اؤلمهسيندن دئييردي. مسلسل اونو دليك دئشيك ائلهديكدن سونرا، سيقاري هله بارماقلاري آراسيندا توستولهييرميش. آنام حضرت ابالفضل ساققاخاناسينا دخيل دوشدو. هؤرولموش ساچيني ايسه كسيب ساققاخانانين دمير داراقلارينا دويونلدي. دئدي، اؤزو هاچان قاييتسا، گلر بونو دا بوردان آچار. قونشولار آتامين قيرخيندا محلهنين مسجيدينده اَيلشديلر. آنام ياسا گئتمهدي. آتامين دؤيوش يولداشلاري مسجيددن بيزيم ائوه گليب فاتيحه اوخودولار. آنام هاميسينا چاي سوزدو. اونلارين بيري آتاملا بيرليكده سالديغي عكسيني جيبيندن چيخاريب بيزه وئردي. سونرا خالچانين اورتاسينا دونوخوب آتامين يارالي اولدوغوندان سؤيلهدي. الينه گولـله دَيندن سونرا، آمبولانس اونو دالا گؤتورور. يولدا آنجاق، قومپارالارين بيري آمبولانسين اوستونه دوشور. آمبولانس پارتلايير، و هر نه اود توتور باجي. پلاكيندان باشقا، رحمتليكدن هئچ زاد قالماميش. بيز عكسه باخديق. آتام گولوردو. شاه عابباس ليمانيندا اولدوغوموز زامان، جومهلر بيزي دنيز قيراغينا آپاراردي. اوجا سسله ماهني اوخويوب منه باليققولاغي ييغاردي، سيقاريني داماغينا قويوب مني چيينينه گؤتورهردي. عكسده، من آتامين چيينينده اوتورموش، اونون گولوشلرينه قولاق آسيرام. گولوشلرين آراسيندا، بيردن تاقتاق قاپي دؤيولدو. يولداشلاريندان ايكيسي ارتش ماشينييلا قاپيميزا گلميش، آنامي ايستهديلر. نيظامي بؤركلريني اللرينه آليب گؤزلريني حيهطيميزين داشلارينا تيكديلر. سونرا، اودقونا اودقونا، آتامين كارون چاييندا شهيد اولدوغونو سؤيلهديلر. گولـله دوز اورهيينين باشينا دَيير، جسدي ايسه چايين آخارييلا گئدير. چايين سويو قيپقيرميزي اولدوقدا، آنام قاپيني باغلادي. پيللهنين اوستونده اَيلشيب سسسيزجه آغلادي. اوندان بو يانا، آرتيق، آتامين يولداشلاريندان هئچ بيريني ائوه يول وئرمهدي. ائويميزده، هاي كويلر ده بيردن بيره باتدي. گئجهلرين سكوتوندا، من درسليك كيتابيميزي آچيب ايران خريطهسينه باخيرديم. كارون چايي بؤيوك بير دنيزه آخير. گؤزلريمي يوموردوم. آتام دنيز ديبيندن باليققولاغي گؤتوروردو، پوستچي قاپيميزي دؤيوردو. ارتش هميشه آتامين نئجه شهيد اولدوغوندان يئني خبرلريني رسمي مكتوبلارلا بيزه گؤندرهردي. كاغيذلارين بيرينده آتامين مين اوسته چيخماغيندان يازميشديلار. مين پارتلاييب آتامين بدنينين بؤلوملري گؤيه سيچرايير. اونلار سايغيیلا بيزدن سينيقسالخاق سوموكلرينين تحويل آلماسيني ايستهميشديلر...
آنام يئنه ساققاخانايا گئدير. آتامي يولا سالدیقدان سونرا، داها هئچ واخت ساچلاريني اوزاتمادي. من، ايندي ده هاچان ساققاخانانين قاباغيندان سوووشورام، گؤزآلتي دمير داراقلارينا دويونلنميش ساچلارا باخيرام. آنامين هؤرولموش بيرچكلري آرتيق، آغآپپاق اولموش.
هیچ نظری موجود نیست:
ارسال یک نظر