بو گون " هند ده" ، 21 دیل وار، و هامیسیدا رسمی و آزاد دیر. آمما انگلیس دیلی او مللتلرین "مشترک دیلی" دیر. و بو اؤلکه نین طلبه لرینین تحصیل و ارتباطین دونیا عرصه سینده چوخ کئنیش شکیلده آسان و ممکون ائدیر.
او حالداکی نئچه مللتلی اؤلکه لرده عینی کانادا، هند و جنوبی آفریقا دا، انگلیس دیلی مللتلرین آراسندا مشترک دیله چئویریلیبدیر، نیه گرک ایران مللییتلری انگلیس دیلین اؤز آنا دیللرینین یانیندا، ائله همان بیرنجی صینیفدا و حتی (کودکستاندا) اؤرگنمه سینلر و دونیانین تمدن قافله سیندن دالی قالسینلار؟ و اونون یئرینه فارس دیلی اونلارا تحمیل اولسون؟
نه زاماناجان بو معرکه لری دولاندیران شوونیستلر ایسته ییرلر اؤز دالی قالمیش فقیر دیل و کولتورلرین بؤیوک گؤسترمکله واقعییتلره گؤز یومسونلار و ایرانین غیر فارس مللتلرینه کی هرزماندان آرتیق و جدی شکیلده اؤز حقوق لارین آلماق اوچون چالیشیرلار اونلارا احمق و آنلاماز گؤزیله باخاراق اونلاری بیگانه عاملی آدلاندیرسینلار؟
اونلاریکی بو گون های هوی و قیشقریق سالیبلار کی فارس دیلی شکر دیر. آیا باشقا دیللرشیرین دئگیل؟ و شکری آز دیر؟
اگر بیر کسین بیر ذره شعوری اولسا بیلر کی هر کسین اؤز آنا دیلی اونا شیریندیر.اصلینده هئچ دیلین ایچینده شکر یوخدور. دیل بشرین سؤز ابزاری و ارتباط وسیله سیدیر.
او کسلریکی بوگون ایگیرمی بیراینجی قرنیده دیکتاتورلوق خصلتیله ایرانین غیر فارس مللترینین دیلینه، تاریخینه ، اتنیک و موجودیتلرینه، هئچ ارزش و حقوق قائل دئییللر و اؤز تحجر فیکیرلرییندن بیر ذره ده آشاغا گلمه ییرلر و انسان حقوقلارینا اؤز باطنلرینده هئچگونه اهمییت و احترام قویماییرلار و بشرییتین مدنی حاقلارین آغیز دولدوران واحد مللت و تمامییت ارضی شعارلاریندان اؤنمسیز بیلیرلر یاخشیدیر بونو دا بیلسینلر کی داها بو تکراری و ضد خلقی شعارلارین ایران مللتلرینین ایچینده یئری یوخدور.
او نلاریکی بو گون ایران مللتلرین بیر پارچا گوسترمکله مختلف اتنیک و کولتورلره سایغیسیزلیق ائدیرلر و غیر فارس اوشاقین فیکرینین سالیم رشدون و فردی استعدادین نابود ائله ییرلر، یاخچی دیر بونودا بیلسینلر کی بو منفی حسسی اوشاقا تلقین ائله مکله کی اونون آنا دیلینین بیلگی و معرفت عرصه سینده، مکتب و اونیوئرسیته محیطینده هئچگونه ارزشی یوخدور، اوندا بیر نوع تحقیر حسسی و اؤزون کیچیک گؤرمک و بی ارزش لیک (ده گرسیزلیک) یارادیرلار و بو طریقله اونون حساس و ظریف روحوندا آغیر وحشتلی و جبران اولمایان بوحرانا ال وورورلار کی زامان کئچدیگجه بو حسس اوشاقدا او تحمیلی دیل و کولتوره قارشی بیر بؤیوک نفرت و انزیجارا چئوریلیر.
و او جور کی اشاره اولدو هر زامان "صاباحکی ایراندا" دموکراسی دان سؤز آرایا گلسه اونو اله گتیرمگ یالنیز " ایران مللیتلرینین" ملی ـ سیاسی نماینده و تشکیلاتلارینین طریقیله ممکون اولا بیلر. و بونون شرطلریندن بیریده محلی پارلامنتلرین تشکیل تاپماسی و آنا یاسا قانونلارین قورولماسی دیر کی ملی تشکیلاتلار بو پروسه نی عهده لرینه آلماقلا خلقلرین ملی ـ مدنی حقوقلارین حیاتا کئچیرده بیلرلر و بو دمکراسینین ایلک پایه لریندن بیریدیر.
و هر حکومت یا تشکیلات کی بو اؤنملی نکته یه توجه ائله مه سه اوجور کی تجربه گؤستریر صاباحکی ایراندا اگر حکومتی الینه آلسا بیر نوع دیکتاتورلوقا چئوریله جک.
و نمونه سی ده یوزایله یاخین کئچمیش دیکتاتور حکومتلر بو جمله دن رضا خان و اوغلو محمد رضا دیر کی انگلیس و آمریکا نین حمایتیله ایران مللتلرینه تحمیل اولدولار و هابئله ایران اسلام جمهوری رژیمی کی اوتوز ایله یاخیندیر کی سایسیز قتل و جنایتلرله خلقلری سرکوب ائده رک اؤلکه نی غارت ائله مکله مشغول دیر.
او تشکیلاتلار کی بوگون " راسیستی ایده ئولوژیلا" (فارس) تک دیل لیگین تبلغ ائله مکله اؤزلرین تمامیله ایران مللتلرینه قیم بیلیرلر بو موضوعا بی توجه اولاراق چوخ ورزیده شکیلده اؤز تشکیلاتلاریندا ان مهم و اساسی رکنی بو جمله دن خلقلرین مللی ایستک و حقوقلارین بالاجا گؤسترمکله دموکراسی و سیاسی پلورالیسمی عملده رد ائده رک ایرانین رئال سیاستین اؤز ذهنی معیارلاریلا محک وورورلار.
و بو آرادا غیر فارس مللتلرینین مبرم و فوری احتیاجلارینا اعتنا سیزاولاراق اؤز موقعییت و پایگاه لارین اونلارین ایچینده سرعتله الدن وئریرلر.
حال بو کی هر رئالیست سیاستچیه بو موضوع گون کیمی آیدین دیر کی بو گون دموکراسی دان صحبت ائله مک یعنی خلقلرین ملی حقوق لاریندان دفاع ائله مک و او نلارین ایستکلرین دیله گتیرمک معنا سیندا دییر.
و ایران آدلانان اؤلکه ده دموکراسی یالنیز مللییتلرین اشتراکیله و اونلارین ملی نماینده لرینین حضوریلا ممکون اولا بیلر.
و بونسوز هر گونه دموکراسیدان دانیشماق بیهوده، واقعییتدن اوزاق، سطحی باخیش و خلقلرین ایستکلرینه توجه ائله مه مکدیر.
هرتشکیلات هر آد و شهرتله اگر یالان و کلی شعارلارلا اؤزون ایرانین مللتلرینه تحمیل ائله سه اوجور کی رضا خان، محمد رضا، و آیت الله خمینینین تجربه سی گؤستردی خفقان و دیکتاتورلوق و خلقلری ازمکدن باشقا بیر هدفی اولمایاجاق. بیر دیکتاتور سیستمکی بیرقرنه یاخیندیرکی ستم آلتیندا یاشایان خلقلرین دموکراتیک و انسانی حقوقلارین اختناق چکمه لرینین آلتیندا نابود ائده رک اولاری قره گونه سالیبدیر.
ایران بیر "چئشیتلی میللتلر" اؤلکه دیر و هر کس بونو دانسا یا سیاستدن درکی یوخدور یادا کی سیاسی منافعه ییله سازگار دئگیل. و اولاریکی مختلف جمعییت و تشکیلاتلاردا داواملی " وای ایران" فریاد ائدیرلر و " تمامیت ارضی" کلمه سین بیر ده گنک کیمی هر آزادلیق سسله یه ن اینسانین باشینا چیرپیرلار بونلارین نه ایرانا اوره کلری یانیر و نده ایرانین خلقلرینه.
بونلار او کسلر دیرلر کی ایسته ییرلر ستم آلتیندا قالان مللتلرین آزادلیق و عدالت طلبلیک سسین کئچمیش دیکتاتورلار و ایران ایسلام جمهور رژیمی کیمی حلقوملادا بوغسونلار.
طبیعیدیر کی بو جریاناتین ماهییتی هم داخیلده همده خاریجده، خلقلرین سیاسی ـ ملی نماینده لرینه ، ضیالیلارینا و هاممیدان قاباق ایرانین ستم آلتیندا یاشایان مللییتلرینه آیدیندیر.
بو گون هر زاماندان آرتیق ایرانین مللتلرینه و اونلارین سیاسی نماینده لرینه و هابئله "وای ایران" شعارینا مدعی اولانلارا آیدیندیر کی ایران فارس شوونیزمینین ده ده سینین مولکو دئییل کی اونا مالکییت سندی اولسون. و هئچ کس بونو ادعا ائله یه بیلمز.
ایران آدلانان اؤلکه مختلف گئوگرافی منطقه دن و چئشیتلی اتنیکلردن تشکیل تاپیبدیر کی بو مللتلر قدیم زاماندان هابئله مین ایللردیرکی اوردا ساکن دیرلر. و اؤز ملی هوییت و منطقه لرین باشقا قوملارین هجوم و حمله لریندن حفظ ائله مک اوچون بیر بیرلریله متحد اولوبلار. "ایران آدلانان" اؤلکه یالنیز بیر قوما یوخ بلکه مختلیف مللتلره کی بیربیرلرینین قونشولوغوندا یاشاییرلار تعللقی وار دیر.
اونلاریکی بو گون آوروپادا و آمریکادا اوتوروبلار و هله ده سؤزلرینده همده یازیلاریندا ایران اتنیکلرینین ملی ایسته کلرینه گؤره حتی بیر کلمه ده دانیشماییرلار و بیله رک ایران جامعه سینین اصلی و ضرورتلی مسئله سینه گؤزلرین یومورلار و داواملی ارعاب و تهدید له ایرانین پارچالانما و تجزیه خطریندن دانیشاراق غیر فارس مللتلرین پایمال اولموش حقوقوندان حتی بیر کلمه ده آغیزلارینا آلماییرلار و اگر بیر کس ایسته ییر غیر فارس میللتلرینه اولان ستمه گؤره بیر سؤال مطرح ائله سین بیلا فاصله اونا اعتراض ائده رک جلسه و توپلانتی لاردا وحشت جوّی یاراداراق دئییرلر:
"فعلا بو سؤزلرین یئری بورا دئییل" و یا "آقا بو سؤزلر ندیربیزیم ایراندا تورک فارس یوخوموزدور و هامی بیر دیر."،
اصلینده غیر فارس مللتلرین مخصوصا آذربایجان مللتین فریب وئرمک و تحقیر ائتمکدن باشقا بیر هدف یوخلاریدیر.
اولاریکی هر زمان بوش و عوام فریبانه شعارلارلا واحد فارس دیلدن و واحد فارس مللتدن دانیشیرلار و باشقا فیکر و ده یشیک لیگی ، پلورالیسم سیاسی و دموکراتیک حرکاتینین جان توتماسیلا مخالفت ائله ییرلر دئمک کی یالان و قالیق فکیردن باشقا هئچ بیر یئنی فیکیر ایران جامعه سینه تحویل وئرمه ییرلر.
حال بو کی اؤزلریده اؤز باطینلرینده بونو بیلیرلر کی ایران مللترینین ایچینده یالنیز آزادلیق ملی و دموکراتیک حقوقلارین تامین اولماسی صلحه ضامین اولابیلر.
پان ایرانیستلر و فارس راسیستلری کی بو گون منطقی بحثین یئرینه مصرف اولونموش و پوچ شعارلارلا داواملی "وای ایران" فریاد ائله ییرلر تاسفله هله ده ایکی قیرانلیقلاری دوشمه ایبدیر کی آنلایالار "ایران آدلانان اؤلکه" مین ایللر بوندان اؤنجه ده هئچواقت واحد و بیر تیکه اؤلکه اولمامیش کی ایندی ایسته سین تجزیه اولسون.
ایران آدلانان اؤلکه بوگونکو " آوروپا " کیمی، منطقه دولتلرینین اتحادیندان ( ایران ممالک محروسه دن) تشکیل تاپمیشدیر کی بیربیرلرینین قونشولوقوندا یاشاییرلار و هدف ده بو ایدی کی باشقا قوملارین حمله و تعرضلرینین قاباقیندا دایانا بیلسینلر.
و بو "اتحاد" او زامان خطره دوشدو کی "رضا خان" ایراندا ایش اوستونه قویولدو. و بئله ایدی کی او و اونون اوغلو محمد رضا کی سیاست و اینسانییتدن هئچ ایی آپارمامیشدیرلار دیکتاتورلوقلا غیر فارس مللتلرین قتل عام ائده رک اونلارین دیل کولتور و تاریخلرینین ریشه سین کسمه گه باشلادیلار و بو وسیله ییله بیر یانار اودا دامن ووراراق اؤز دودمانلارین اؤز اللریله یئله وئردیلر.
اصلینده دئمه لیک کی "ایران آدلانان اؤلکه نین" داغیلماقی اوزاماندان باشلاندی کی " رضا هفت تیری" انگلیس دولتینین وسیله سیله ایش اوستونه گلدی و هابئله منحوس پهلوی دودمانین قورماقلا اوغلو معدوم محمد رضادا ده ده سی کیمی آذربایجان، کوردستان، بلوچستان، ترکمنستان، الاهواز، خراسان، قشقائی و بختیاری لارین مدنی و دموکراتیک حرکتین قانلارینا بویا ماقلا یالنیزبو پروسه نی دالی سالدی.
و ایندی ایران اسلام جمهوری رژیمیده تقریبا اوتوز ایل ایران خلقلرین سرکوب ، زیندانی ، ایشکنجه و قتل عام ائله مکدن سونرا قدرتین یاواش یاواش الدن وئریر.
و دئمه لی ییکی ایرانین داغیلماسی تقریبا یوز ایل بوندان اؤنجه باشلانمیش و بو تدریجی آمما حتمی حرکت بوگونون و یا دوننین ایشی دئییل کی ایندی بیر کس اونون قاباقین ضد خلقی و ایچی بوش شعارلارلا آلا بیلسین.
و بو آغیز دولدوران و پوچ شعارلار کی ایران آدلی اؤلکه نی یالنیز واحد فارس دیللی ، واحد فارس مللتلی، واحد فارس مملکتی، واحد فارس حکومتی ... و باشقا واحد لرله تبلیغ ائله ییر و تانیتدیریر داها کهنه لیب و اؤز تاثیرین ایران مللتلرینین آراسیندا چوخدان الدن وئریبدیر.
اونا گؤره کی ایران خلقلری ائله همان واحد دیل، واحد مللت و واحد حکومت و واحد مملکتین چرچیوه سینده بوتون آزادلیق و دمکراتیک حقوقلارین و هابئله اؤز سیاسی ـ اجتماعی و مدنی یاشایشلرین الدن وئره رک مستبد حکومتلرین باسقی سی آلتیندا غیر اینسانی و گرگین جنایتلره معروض قالیبلار.
و بیر قرنه یاخیندیر کی بوغم انگیز ضد اینسانی و آغیر سرنوشتی اؤز دری، سوموک و قانلاریلا تجربه و لمس ائله یب لر و هله ده ائله ییرلر.
و اصلینده یالنیز دموکراتیک آزادلیقلار، اؤز سرنوشتین تعیین ائتمک، ملی ـ محلی پارلامنتلرین قورولماسی و سیاسی پلورالیسمین حیاتا کئچمک شرطلریدیر کی ایراندا ساکن اولان مللتلرین غصب اولونموش سیاسی ـ اجتماعی، مدنی و کولتورل حقوقلارین اونلارا گئری قایتاریب و اونلاری ضمانت ائله یه بیلر. و هر گونه ایچی بوش و ضد خلقی شعارلار کی اونلاری بو هدفدن اوزاق سالیر مللتی آلداتماقدان باشقا هئچ بیر مثبت هدفی یوخدور.
اصلینده اتنیکلری فیزیکی صورتده یکسان ائتمک و اولارا تک دیللیگی تحمیل ائله مک و اونلارین ایستکلرین قولاق آردینا وورماق ایران خلقلرینین سعادت و گله جه ییله تضاد واریدیر
اصلینده اتنیکلری فیزیکی صورتده یکسان ائتمک و اولارا تک دیللیگی تحمیل ائله مک و اونلارین ایستکلرین قولاق آردینا وورماق ایران خلقلرینین سعادت و گله جه ییله تضاد واریدیر
هیچ نظری موجود نیست:
ارسال یک نظر