و بونودا اضافه ائتمه لییک بو معرکه لری گزدیرنلر کی ایسته ییرلر کئچمیش شاه زامانی کیمی پلیسی سیستم قورماقلا بو دونه آزادلیق شعاری آلتیندا کلی دانیشماقلارلا دموکراتیک جامعه نین تشکیل تاپماسینین قاباقین آلسینلار، اصلینده عمومی اغتشاش و عصیاندان باشقا هئچ بیر ذات عاید لری اولمایاجاقدیر.
اونا گؤره کی دای بوندان سونرا ایران مللتلری او زاماناجانکی اؤز اینسانی و دموکراتیک حقوقلارینا چاتمایبلار اؤز ملی ـ مدنی مبارزه لرینه داوام وئره رک بو عرصه ده بوش و یالان سؤزلره آلدانمیاراق هئچ جوره دیکتاتورسیستیمینه بویون ایمه یه حاضیر دئییللر.
پان ایرانیستلر و فارس راسیستلری کی بو گون خبر ارگانلارینین گئنیش تبلیقاتیلا غیر فارس مللتلرینه آلچاق باخاراق اونلاری خوار و تحقیر ائله ییرلر و تمامیت ارضی و واحد فارس مللتی آدیلا بؤیوک ایران و سانترالیزم حکومتدن دانیشیرلار و قاباقدان تعیین اولونموش و ضد خلقی شعارلارلا سیاسی قدرتی اللرینه کئچیرتمک ایسته ییرلر و بو فیکیرلری اؤز رویالاریندا بسله ییرلر واقعییت بودور کی ایران مللتلرینه خیانت دن باشقا هئچ بیر یاردیم ائله مک نییتینده دئییرلر.
ایندی بیر قرنه یاخیندیر کی ایران خلقلری ائله همان واحد دیل، واحد مللت، و تمامیت ارضی شعارلارینین چرچیوه سینده قنل عام و غارت اولوبلار و ملی ـ کولتورل و سیاسی و اکونومیک و حتی مدنی و اجتماعی حقوقلارین شاهنشاهی و آیت الهی دیکتاتورلارینین واسیطه سیله الدن وئریب لر.
اونلاریکی ایران مللییت لرینین ایسته ک لرینه اهمیت وئرمیه رک عوام فریب لیکله ایرانین بیرلیگیندن دانیشیرلار و داواملی هر سؤزده ایرانین داغیلماسین بهانه توتاراق هرجوره آزاد بحثین و دموکراتیک ایستکلرینین قاباغین آلیرلار و فریبنده شعارلارلا یؤیوک ایراندان دانیشیرلار و هر اعتراضلی سؤالین قاباقیندا اونا بونا تشر توتاراق دئییرلر:
" اول قویون ایران آزاد اولسون سونرا هامیا دموکراسی وئریلر."
اصلینده بئله کلی و عوامفریب سؤزلرله هر جوره دقیق و رئال تحلیلدن باش قاچیرداراق عملا اؤز شخصی منفعتلریندن باشقا هئچ بیر شئی یه دوشونمورلر.
اونا گؤره کی "دموکراسی حالوا دئییل کی خلقین آراسیندا پایلانسین".
دموکراسی گرک ائله خلقلرین ملی نماینده لرینین نظارتیله حیاتا کئچیریلسین. و هر مللت اؤز مدنی ـ کولتورل ، سیاسی ـ اقتصادی و حق تعیین سرنوشت حقوقونا نایل اولسون.
آمما اونلاریکی خلقلرین مسلم حقوقون قابول ائتمه یرک بو مسئله دن باش قاچیردیرلار و یالنیش فیکیرلرله هر جوره درست و منطقی تحلیلی رد ائده رک اونون یئرینه "بؤیوک ایران، سانترالیزم دولت و و فارس دیلین" قویورلار، اصلینده ذهنلری مخدوش ائده رک غیر فارس مللییتلرینین دیل ، تاریخ ، کولتور و مدنییت حقوقونا هیچ بیر ارزش قویمیاراق اؤزلرین دیکتاتورلوق حدینه تنزل وئریرلر.
اونا گؤره کی تمرکز قدرت کی بولار اوندان دانیشیرلار بولارا او ایمکانی یاراداجاق کی بیر طرفدن نظامی قوه نی اله آلیب مملکتده سیاسی توت ها توت سالاجاقلار، بیطرفدنده کئچمیش شاه و ایندیکی اسلام جمهوری رژیمین باشیندا اوتورانلار کیمی دوباره اؤلکه نین ثروتین چاپیب و خلقلری قتل عام ائله مگه باشلایاجاقلار و هئچ کسده جرئت اولمایاجاق آغزین آچیب اونلارین علیهینه بیر سؤز دئسین.
او تشکیلاتلارکی بو گون اؤز هوادارلارینین و عضو لرینین ایچینده قورخو و وحشت آتمسفری یارادماقلا آزاد و دموکراتیک بحثدن اوز قاچیردیرلار و ایراندا غیر فارس مللییتلرینین دیلین ، کولتورون و حقوقلارینین رسمیته تانینماسینا مانع اولورلار و اصرارلا یالنیز فارس دیلیندن و فارس مللتیندن دانیشیرلار اصلینده فقط خلقلری یوخ هابئله اؤز تشکیلات هوادارلارینین گؤزلرین واقعییتلره یومماقلا اونلاری گمراه ائله مکدن باشقا بیر هدف یوخلاریدیر.
البته اوجور کی اشاره اولوندو بئله داورانیش و چابالار بیرفیکیر سیستمی دیر کی آپاریاتد و فارس راسیستلری ایسته ییرلر اونو سیاسی تشکیلاتلاردا بیر عوامفریب خط مشی یه چئویررکن بو وسیله ییله تشکیلاتی اعضالارین سانسوررا معروض قویاراق اونلارین آراسیندا بیر روانی قورخو و تحقیر حسسی یارادسنلار و بو بحثلری کی ایللردیر داخلی و خارجی مطبوعاتدا دیقتیله بحث اولونور اؤز تشکیلاتلارین ایچینده قاداغان ائله سینلر.
او یئره جن کی دای هئچکس جرات ائلیه بیلمه سین ایرانین اساس و اصلی مشکولونون باره سینده یعنی مللتلرین سیاسی و مدنی حقوقونا گؤره حتی بیر کلمه سؤز آغزینا آلیب دانیشسین.
او شخصلریکی هله ده ایرانین غیر فارس مللتلرینین دیلینین رسمی اولماقیله مخالفت ائله ییرلر او یئرده کی بو پروسه خلقلرین ملی ـ سیاسی جمعییت و تشکیلاتلارینین آراسیندا چوخ جدی و مختلیف شکیلده اؤزون هر گوندن آرتیق گؤسته ریر، آمما آقالار بونا باخمیارق هله ده اؤزلرین او یئره قویمایب واقعیتلره گؤز یومماقلا اؤز سیاسی سرنوشتلرینین گئدیشاتینین چرخین انتحار اوچورومونا طرف سوق وئریرلر کی بونون نتیجه سی شکست و اضمحلال سیاسی دان باشقا بیر شئی نظره گلمه ییر.
اونلاریکی هله ده اؤز رویالاریندا سیاسی رهبر لیگینین یوخوسوندا سئیر ائدیرلر و اؤز ایده ئولوژی دونیالاریندا ثروت و قدرت قصرلری گؤرورلر و ائله بیلکی ایرانین غیر فارس مللتلرینین دای هر جوره مشکول و غم وغصه سی قورتاریبدیر و سیاستمدار قحطینه گرفتار اولوبلار و فقط فارس شوونیزمین و دیکتارتور پان ایرانیستلری بکله ییرلر کی آقالار( خارج انزواسیندان) تشریف گتیرسینلر وصدارت تختینده اوتوروب غیر فارس میللییتلرینه حکومت ائله سینلر.
البته بونودا دئمک لازیمدیر کی شوونیست و پان ایرانیستلر کی ایران مللتلرینین حاد مسئله سیندن یعنی " پلورالیسم سیاسی، و ملی ـ دموکراتیک حقوقلارینین مطرح اولماقیندان باش قاچیردیرلار و بو ایسته کلرین مطرح اولماسیله مخالفت ائله ییرلر، بیر عللتیده بودور کی آقالار اول ایسته ییرلر ایراندا سیاسی قدرتی اله آلسینلار و رهبرلرینین فرمایشیلا پرزیدنتی ، دولتین باشباخانین، کابینه وزیر لرین کی قاباقدان تعیین اولونوبلار و هابئله فک وفامیل، طایفا و عشیره لریله ایرانین سابق رژیملری کیمی ایش اوستونه قویسونلار و اؤز موقعیت لرین محکم ائله سینلر و بو آرادا داخلی و خارجی حسابلارین نئچه میلیونلوق وجه نقدییله دولدورسونلار، اوردو و سلاحلی قوه لری اللرینه آلسینلار سونرا اگر زامانلاری اولسا "ایرانین غیر فارس مللتلرین" اؤز محضرمبارک لرینه چاغیریب و اونلارا آزادلیق وئرسینلر. عجب گولمه لیدیر!
او تشکیلاتیکه بیر کسه حتی ایجازه وئرمه ییر بیر کلمه اؤز آنا دیلینده دانیشسین و پلیسی سیستمله اؤز کادر و هوادارلارینن ایچینده کی 70% مختلیف غیر فارس اتنیکلردن تشکیل تاپیبلار قورخو و وحشت یارادیر و اونلارا ایمکان وئرمه ییر کی ایران مللتلرینین ملی ـ مدنی و دموکراتیک حقوق و ایستکلرینه گؤره حتی بیر کلمه سؤز آغیزلارینا آلیب دانیشسینلار، آیا حکومته گلندن سونرا اونلارا نه آزادلیقی وئره جکدیر؟
او شوونیستلریکی ایران جمعییتینین چوخون تشکیل وئرن غیر فارس خلقلرینه اکراه لا باخیرلار و حتی اؤز تشکیلاتلاریندا اونلارین آدین دیللرینه گترمکدن قیافه لرینده بیر نوع اوره ک قاریشتران نفرت یارانیر و اونلاری آلچاق و خوارائله مگ اوچون خوشمزه لیگله اهانتلی و پیس جوک اشاعه وئریرلر، ایندی بیردن او درجه شخصیت و شعورا یئتیشیبلر کی ایسته ییر لر حکومته گلندن سونرا کی یئرلرین برکیتدیلر اولارا سیاسی ـ کولتورل آزادلیقی و اوز سرنوشتلرین تعیین ائله مک حقی باغیشلایالار؟
بیرمثل دئییر:
" خوروزون قویروقونا اینانیم یا حضرت عباس آندینا؟ "
البته بونودا خاطیرلاماق لازمدیر کی سیاسی شکستلر، اورکده قالمیش اوغده لر، برباد اولموش آرزولار، روحو چورودن یاس و نا امید لیکلر، مخصوصا سیاسی انزوا ، مردم و جامعه ایله مستقیم ارتباطین اولما ماسی بونلاری اوقدر نژدا پرستلیک و کولتوراستثمارلیقینا طرف سوق وئریبدیر کی جامعه نین عینی و ذهنی شرایطین و هابئله توپلامسال و سیاسی حرکتلری دقیق تجزیه و تحلیل ائله مکدن عاجز قالاراق ذهنی عالمده اؤزلرین ایرانین گله جک سیاسی حرکت لرینین مرکزی نقطه سینده گؤرورلر و فیکیر ائله ییرلر ایرانین غیر فارس مللتلری اللرینه گول آلیبلار و فقط بیر عده فارس راسیستلرین و دیکتاتور پان ایرانیستلری بکله ییرلر.
و تاسفله بو نژاد پرستلر هله ده اینانیرلار کی اگر صاباح سو سودان تکان یئسه حاکمییتی ایراندا اللرینه آلاجاقلار و سابق دیکتاتورلار کیمی ایران خلقلرینین بوینونا مینیب اونلارا حکومت ائله یه جکلر. و گینه ده بو راحاتلیقا ایران آدلانان اؤلکه نین ثروتین چاپیب اؤز حسابلارینا تؤکه رک دیلله نه نین دیلین کسه جکلر.
او آپارتاید و پان ایرانیست تشکیلاتلاریکی مختلیف آدلارلا اؤزلرین ایران مللتلرینه قیم بیلیرلر و اونلارین ملی مسئله لرینین طرح اولماقیندان اوز چئویریرلر و توهین وافترا ییله اولارین "اؤز سرنوشتین تعیین ائتمک " حققیله مخالفت ائله ییرلر اؤزلرین هر آد و شعار آلتیندا گیزلدسه لرده ایران اسلام جمهوری رژیمی و کئچمیش دیکتاتورلارکیمی مردمی سرکوب ائله مکدن باشقا بیر یول گئتمه یه جکلر.
چون اونلارین هدفی مردوما خدمت ائله مک دئگیل بلکه اولار ایرانی بیر پارچا (یکدست) گؤره رک چاپماق نییتینده دیرلر. و اگر ایران آدلانان اؤلکده هر غیر فارس مللتین اؤزونون محلی پارلامنت و دولتی اولسا بوتون طبیعی ثروتلره نظارت ائله یرک دای بیر سری چپاولگر پان ایرانیست و دیکتاتورشوونیزمه ایمکان وئریلمز کی غیر فارس میللتلرین طبیعی و اینسانی ثروتلرین چپاول ائله سینلر.
البته سود جو پان ایرانیستلر و فارس ناسیونال شوونیسمی کی دیکتاتورایران ایسلام جمهوری رژیمی کیمی مللتلرین ایستکلرینه جوره به جوره آد قویماقلا اونلاری اجنبی ، تجزیه طلب، خائن ، وطن فروش، جاسوس و ... آدلاندیریرلار و خلقلری اؤز دمکراتیک و سیاسی ـ مدنی حقوقلاریندان محروم ائله ییرلر، البته اؤزلریده بونو بیلیرلر کی بئله تهمت و اوجوز برچسبلرین زامانی کئچیب دیر و رنگی سولوبدور و مللتلرین آزادلیق ایسته ین اراده سینه دای هیچگونه تاثیری یوخدور.
اونا گؤره کی گله جکده " دموکراتیک ایران آدلانان" اؤلکه ده
هر شئیدن اول و چوخ مهم میللتلرین سسی (رای) دیر کی هر خلقین حکومتینین فورمون تایین ائده جک.
و بیر ممالیک محروسه سیستیمینده یعنی اؤز سرنوشتین تعیین ائتمک حقی، "سکولاریسم" ( دین و دولت آیریلیقی) ، فدرالیسم اصوللارین نظرده توتماق و هابئله منشور مللین اصلین اجرا ائله مک، دمکراسی و اینسان حقوقولارینا احترام قوماق، قادینلارین کیشیلرله برابرلیگینه سایقی گؤسترمک، ملی آزادلیقلارا بو جمله دن: دیل ، کولتور، موسیقی آزادلیقلارینا قیمت وئرمک، مللتلرین قید و شرطسیز دین و مذهب و هابئله سیاسی، توپلامسال، کولتورل، حزب، سازمان و تشکیلاتلار آزادلیقین تامین ائتمک، ایشچیلر سندیکا لارینین قورولماسی، جامعه ده بوتون قشرلرینین آزادلیق و صینفی حقوقلارین رعایت ائله مک بو جمله دن : ضیالیلار، طلبه لر، هنرمندلر، زحمتکشلر، اکینچیلر و هابئله خیاواندا تظاهرات آزادلیقلارین حیاتا کئچیترتمک و اونلاری قوروماق ، هر جوره باسقی و شکنجه نی زیندانلاردان ییغیشدیرماق، اعدام قانونون لغو ائتمک ، مدنی حقوقو رعایت ائله یب ، قانونا احترام قویماق، دموکراتیک اصوللارین قوروب و پلورالیسم سیاسینین چرچیوه سین محکم لندیرمک اساسیندا دیر کی ایران مللتلری اؤز مسلم و اینسانی حقوقلارینا نایل اولا بیلرلر. ایندی منطقه ده ژئو پولیتیک ده ییشیکلره باخاراق خلقلر اؤزلریده بیلیرلر کی ایگیرمی بیر ینجی قرن سیاسی ـ کولتورل و آزادلیق عصری دیر و زامان مللتلره داخلی استثمار و مللی ستمین قورتولوشوندان و اؤز سرنوشتین تعیین اتمک حققین بشارت وئریر.
اونا گؤره کی دای فرهنگی و اقتصادی برده دارلیقین زامانی آخیرا یئتیشیبدیر و ستم آلیندا یاشایان خلقلر محکم اراده و آزادلیق شعاریلا گون به گون دمکراسییا ال تاپماق مقصدیله مللی ستمه سون قویماق ایسته ییرلر.
و باسقی آلتیندا قالان خلقلردمکراتیک قانون اساسیندا متقابیل احتراملا اؤز سیاسی مقدرات لارینا حاکیم اولماق نییتیله باریش و دوستلوقلا اینسانی و برابر مدنی حقوقو اله گتیرمک اوچون بو پروسه نی قاباقا آپاریرلار.
البته بو دیالیکتیک و منطقی جریان مللتلرینین واسطه سیز ریشه لی سیاسی و توپلامسال حرکتلرینین نتیجه سیدیر کی بیر قرن بوندان قاباق تراژدی تجربه ایله تاریخ وسعتی قدر باشلانیبدیر و هئچ قدرت داها ائله یه بیلمیه جک بو تاریخی پروسه نین قاباقین آلسین.
هیچ نظری موجود نیست:
ارسال یک نظر