دارغینام ، هر شئی دن و هر کسدن دارغینام .هیچ بیر شئی دن و هیچ کیمسه دن دانیشماق ایسته میرم . یالنیزام .
ائوده اوتورموشام . بو اوتاندیریجی و یاراماز گونلردن اوزون و راحاتسیزام . مملکتیمی دوشونورم و دوشوندوکجه قیزیرام . خالقیمیزین ساده لیگی و دولتمن لریمیزین یالتاقلیغی منی قیزدیریر. مملکتیمین ویرانه اولدوغونا باخیرام و باخدیقجا قیزیرام. اؤلکه مین دورمو ، خالقیمیزین جهلی ، و دولتیمیزین جنایت له خیانتی و یئتنکسیزلیگی....
بو دورومدا سیغیناجاغیم یئر بؤیوک شاعیر « ناظیم حیکمت » ین شعر دیوانی دیر البت . دیوانی الیمه آلیرام و اؤزومو «ناظیم حیکمت» ه تاپشیریرام .
" عجاییب لشدی هاوالار
بیر گونش ، بیر روزگار ، بیر قار
آتم بومباسی دنملریندن دییورلار "
اؤلکه میزین کولتوروندن ،تاریخیندن ، فولکلوروندان ، دده قورقودوندان ، کوراوغلوسوندان ، دلی دومرولوندن ، سؤز آچیب دانیشماق یاساق دیر ، آنجاق سؤز قونوسو « آتوم بومباسی» دیر ایندی !
ناظیم حیکمت فقیر میلتینه ایکرام ائده بیلدیگی ایچین بیر آلما الینده بولسادا ، ایندی بیزیم مملکتیمیزده بو آلما دا یوخدور بئله . یعنی دوغروسو واردیر آما زینداندادیر. او آلمانی دوستاق ائدیب لر . او آلما « سعید متین پور » ون قلبیدیر . نه یازیق .
" سونرا شو اون ییلدان بو یانا
بنیم فقیر میلتیمه ایکرام ائده بیلدیگیم
بیر تک آلمام وار الیمده
بیر قیرمیزی آلما
قلبیم ! ... "
« سعید متین پور» ون دا یولو و آماجی ناظیم حیکمت ین یولو و آماجی کیمی « یئنی بیر عالم ایچین دؤیوشمک دیر » :
" من ایگیرمینجی عصیرلی یم
و بونونلا اؤوونویوروم
بانا یئتر
ایگیرمینجی عصیرده اولدوغوم صف ده اولماق
بیزیم طرفده اولماق
و دؤیوشمک یئنی بیر عالم ایچین "
نه گؤزل دیر بو « دؤیوشمک یئنی بیر عالم ایچین » ! او عالم کی اورادا آنا دیلی یاساق دئییل. خالقیمیزین اؤز کیملیک بایراغی یوکسلمکده دیر . او یئنی عالمده میلت لرین اؤز دوزگون ایستک لری ایرلی لشیر . او یئنی عالم ده اوشاقلار و یئنی یئتمه لر اؤز آنا دیل لرینده ساواد و بیلیک قازانیب و آنا دیلینده یازیب اوخویورلار. او یئنی عالمده هیچ کیمسه نه تحقیر اولونور و نه باشقالاریندان اوستون ساییلیر . او یئنی عالم ده کیمسه دوشونجه سینه گؤره حبسه آلینماز و آنا یاسانین اجراسینی طلب ائتمکدن اؤترو زیندانا سالینماز ! او یئنی عالم « سعید متین پور » ون عالمیدیر و نه گؤزل عالم دیر !
«متین پور»ون یولو اینام و اینانج یولودور . او " اینانمیش آدام " دیر و نه ایسته دیگینی بیلیر و عقیده سی یولوندا حتی جان وئرمکدن ده بئله واز گئچمیر .
" من قورتاریب کلّه مده « ندا » و « سوال » ایشارت لریندن
بؤیوک غوغا دا
آچیق و اندیشه سیز
گیردیم صفیمه "
سعید بیلیر کی بو یولا گیرمک و بو مبارزه ده ظفر چالماق و خالقیمیزین دوشمن لری قارشیسیندا نائلییت قازانماق چوخ دا ساده و قولای دئییل . بو یولدا یانماق گرک ، کول اولماق گرک . آما نه قورخو ؟ اؤزگور اینسانلارا بوندان باشقا بیر یول وار می دیر ؟
" من یانماسام
سن یانماسان
بیز یانماساق
ناسیل چیخار قارانلیقلار آیدینلیغا ؟! "
«ناظیم حیکمت» تورکیه نین « میلّی مارش » یندا گلدیگی « گلجک دیر سانا وعده ائتدیگی گونلر حاقین » جومله سینه قارشی چیخاراق دئییر: " خیر ، گلجک گونلر ایچین گؤکدن آیت ائنمدی بیزه ، اونو بیز کندیمیز وعده ائتدیک کندیمیزه "
و گونئی آذربایجانمیزدا دا او گونلرین گلجگینه ، ائوده اوتوروب سوسماق دئییل ، سعید متین پور و دوستلاری کیمی زینداندا و حبس لر ده یاشاماق دا گرکیر . رحمتلی پروفسور زهتابی دئدیگی کیمی : " موفته سعادت قوشو گلمز اله ، حاق وئریلمز آلینار ، حاقی سئون ال اوزادیب مشعله ، حمله ائدر ظولمته ایمان ایله ! "
ایندی بیر ایلدیر سعید و ، بو سون آیلاردا ، بیر سیرا آذربایجانیمیزین چالیشقان گنج و یازارلاری ناحاق یئره دوستاق اولونوبلار. سعید بوندان اؤنجه ده نئچه دفعه زیندانا آلینیب و ایشکنجه لره معروض قالمیشدی . استبدادی و سؤمورگه بیر اؤلکه ده ، استبداد و سؤمورمک ایله دؤیوشمکدن باشقا بیر چاره ده وار می دیر؟ بیزلر ده سعید کیمی اینام ، دؤزوم و طاقت یوخدورسادا اگر ، آما هئچ اولماسا او بؤیوک اینسانلاری آنماق و آغیرلاماق چیگنیمیزده و اوموزلاریمیزدا بیر بؤیوک یوک دور یقین !
بو یازینی اوخویان دوستلار !
بو گرگین چاغیمیزدا بو آغیر دوروملا دؤیوشمک بیزیم آلین یازیمیزدیر! اگر " هاوا قورشون گیبی آغیر " هئچ اولماسا سن ده " باغیر ، باغیر " !
" آلدیرما آنام نه چیخار
نه چیخار
قودورتسون
قارا یئل
سولاری ،
خزر ده دوغانین
خزر دیر مزاری ! "
«ناظیم حیکمت» و «سعید متین پور»ون یولو بو یولدور . بیزلر ده بو اینام لا یولا چیخارساق اگر ، «ناظیم» ین سؤزلرینه ایناناق کی :
" گوزل گونلر گورجگیز چوجوقلار ،
ایشیقلی گونلر گؤرجگیز ...
موتورلاری ماویلیک لره سوره جگیز ،
ایشیقلی ماویلیک لره سوره جگیز .... ! "
هیچ نظری موجود نیست:
ارسال یک نظر