آذربايجان تورکلري بو گون ايلک دفعه اولاراق بؤيوک بير بايرام ساخلاييرلار: ايستيقلال بايرامي!!!بوندان بير سنه اول زاقافقازييانين موقداراتيني حل اوچون طيفليسه توپلانميش اولان موسلمان وکيللري تاريخين اؤيله بير آنينا تصادوف ائتميشديلر کي، يؤز سنه ليک اسارته يالنيز يوکسک بير آمال نتيجه سي دئييل، عئيني زاماندا ضروري بير احتيياج کيمي خاتيمه وئرمک مجبوريتينده قالميشديلاردي.
اوت زاقافقازييا ميلتلري بالمجبور اعلان ايستيقلال ائتميشديلر.
بالمجبور اعلان ايستيقلال !!!
ايستقلاليميزا دوشمن اولانلار بو ايکي "مجبوريت" و "ايستيقلال" سؤزلريني بير آرايا توپلانماسيني "ايجتيماع ضددين" قلبيندن ادد ائتمکله، زاقافاقازييا جومهوريتلري نين غئيرطبيعي اولدوقلاريني ايثبات ائتمک ايسته ييرديلر.
فقط ، بو مولاحيظه ظاهيرده دوغرو گؤرونسه ده باطينده اؤيله دئييلدي.
بير نوزادين جنین مادردن خيلاص اولوب دا ، دونيايا گلمه سي هئچ شوبهه سيز بير واقعه ي ايستيقلالدير.قادينين وضع حملینه ديگر تعبيرله بيزده "آزاد اولماق" دئييرلر. حالبوکي بو "آزادليق" عئيني زاماندا بير ضرورت طبيعی ، بير مجبوريتدير...
اؤيله بير مجبوريت کي، حيات علم اونا باغليدير.
زاقافقازييا "سئيمي" نين اعلان ايستيقلاله مخصوص اولان گونونده "کادئت" فيرقه سي نوماينده سي "سئيم" اوضاعلاري نين او گون وظيفه لري نين آغيرليغيندان دويدوقلاري حيسيياتا ترجومان اولاراق، هر کسي اؤزو کيمي تصور ائده رک: "باخينيز سانکي "سئيم" بير مؤهتريزين" باشي اوستونده دورموشدور - دئديگينه موقابيلتا من: " اف ائدرسينيز، بو ايضطيراب و انديشه بير مؤهتريزين دئييل، بير لهويسه نين (اویونجاغین)باشي اوستونده گؤرولن ايضطيرابدير " .
زاقافقازييا لهويسه سي نين "آزاد" ليغي چوخ موشکولاتلا اولموشدو. چونکي بيردن اوچ نوزاد دوغموشدو:
گورجوستان، آذربايجان و ائرمنيستان!
هر نوزاد کيمي ايستيقلال دخي جان کيمي سئويلديگي حالدا جانان کيمي جفاکاردير. بير نوزاد پايدار اولوب کندي باشينا دولانار بير آدام اولونجايا قدر آتا و آناسينا نه انديشه لر، نه غملر، نه غوصه لر وئرمز!
ايشته، عئيني ايضطيرابلاري، عئيني غوصه و دردلري فقط بونونلا توام اولان سئوينج و اعتينالاري بيز کئچن سنه ايستيقلاليندا کئچيرمه ديک مي؟
مارت حاديثاتي ايلمه سي نين بير نتيجه سي اولاراق داوام ائدن باکي اسارتي، شاماخي نين بو دفعه يئر آلتينداکي ماواديئرکه نييه دن دئييل، اينسانلارين فيطرتينده کي شرارتدن موتزلزيل اولوب دا، خاک ايله يئکسان اولماسي عوثمانلي تورک قارداشلاريميزين سون اوميدسيزليک دمينده يئتيشيب ده بيزي دوشمنلردن خيلاصي؛ باکي نين ايستيردادي، سونرا اينگيليسلرله برابر بيچئراخوو و سايرلري نين گليشي ايله حاصيل اولان ايضطيراب و انديشه، پارلامانين تنتنه لي صورتده آچيلماسي، آذربايجان اوردوسونون ورودي، قاراباغ، ناخچيوان، لنکران مسئله لري، داغيستان فاجيعه سي، نهايت، بوگونکو شنليکلر – ايشته بير سنه ليک حيات ايستيقلالين خوف ايله اوميد آراسينداکي ايضطيراب و اطمينان دقيقه لري!
هر ناسيلسا نوزاديميز بير ياشينا چاتدي! بو بير ايلين عرضينده آذربايجانليلارين مادتا وئرديکلري قوربانلارا موقابيل قازانديقلاري يالنيز خاريجي بيزي موستقيل بير ميلت کيمي تانيماغا دوغرو و گؤسترديگي بعضي تمايلات دئييل، ان بؤيوک شئي فيکر حريت و ايستيقلالين آرتيق ميللي بير فيکير اولدوغو کئيفيتدير.
بوندان ايکي سنه اول بيز تورکچولر آذربايجان شعاريني بؤيوک گول دسته نين زنگين بير گولو کيمي تصور ائتديکده، يالنيز روس کادئتلري ايله سوسياليستلريندن دئييل، اؤز کادئتلريميزله سوسياليستلريميزدن دخي موقابيله گؤروردولر.
بير سنه سونرا بوتون فيرقه لر بونو بير ضرورت کيمي قبول ائده رک آذربايجان ايستيقلالي نين اعلانيندا ايشتيراک ائتديلر. بو گون ايسه هر کس اونو بير موهيبت کيمي قارشيلاييب بير آمال و بير ايده آل کيمي آلقيشلايير!
بو آلقيشلار يالنيز سياسي فيرقه لرين نوماينده لريندن دئييل، آغاج توفنگلري ايله "ايلري،ايلري!" – دئيه سوقاقلاري دولاشان گنجلرله "آذربايجان عسگرلري نين" ياشار گؤزلري و "آللاه بدنظردن ساخلاسين" دوعاسي ايله اؤتورن جماعتدن نشئه ي ايستيقلالي درک ائتميش خالقدان گلير.
بوندان آلتي آي اول آذربايجان مجليس مبوعثانين آچيلديغي گون:"بير کره يوکسلن بايراق بير داها ائنمز!" دئميشديم.
او زامان ايچينده بولوندوغوموز زامان او قدر موشکول و او قدر پرخوف ايدي کي، يوکسلتديگيميز بايراغي پک ده يوکسکلييه قالديرمايير، اونو يالنيز پارلامان بيناسينا مونحصير ائتديريبده "مدارا" گؤسترمک مجبوريتينده قاليرديق.
بو مجبوريتدن مونتشير اولان بعضي بدبينلر "هانييا بير کره يوکسلن بايراق، بير داها ائنديريلمز!" دئييرسينيز؟ – دئييرديلر!
ايشته قوي بوگونکو گون، ميللي بايراقلارا بويانميش آذربايجان پايتاختي، او کيمي بدبينلرين قلبيني تصفييه ائتسين!
بير سنه ليک حيات حقيقتا ده گؤستردي کي، بير کره آچيلميش لواي حريت بير داها بوکولمز!
دوغرودور کي، بو گون يوکسلتديگيميز ايستيقلال بايراغيني ائنديرمه يه، آچديغيميز لواي حريتي بوکمه يه چاليشان دوشمنلر وار. بو دوشمنلر بو گون هر طرفدن بيزه پوسقورماقدا، بيزي تهديد ائتمکده ديرلر.
فقط، بير طرفدن ميلتيميزين گوندن-گونه آرتان عزم ميلليسينه، ايستيقلال و حريتي يولوندا ثابيت قالاجاغينا، ديگر طرفدن ده، نه دئسه لر، دونيا اوزه رينده تاثيرسيز قالماياجاق، ميلليت فيکر معظيمي نين بالاخره اعلان ظفر ائده جه یينه اينانماقلا، بو تاريخيميزي تبريک ائده ليم ده، ايناناليم کي، بير ياشيندا نوزاد ايستيقلال تهلوکه لي قرانلاريني کئچير.
بير کره يوکسلن لوای ايستيقلال، بير داها ائنمز!
آذربايجان "قزئتي، ن 190، 28 ماي 1919-جو ايل"
م.ا.رسول زاده
هیچ نظری موجود نیست:
ارسال یک نظر