سايين سولئيمان اوغلو جنابلاري! خبرلرده ياييلديغي كيمي اؤتن گونلرده اولوسلارآراسي يازارلار و شاعيرلر كلوبو يئتكيليلري ايله گؤروشونوز اولموشدور. ايلك اؤنجه بو كلوب حاقيندا قيسسا اولسا دا بيلگي وئرمه نيزي ريجا ائدرديك.
سولئيمان اوغلو: بیلیندیگی اوزره P. E. N كلوب اینتئرنشنال، اولوسلارآراسی یازار، قوشوقچو، دئنه مچیلری بیر چاتی آلتیندا توپلاماغا چالیشان چوخ اسکی بیر قورومدور. P. E. N كلوب اینتئرنشنالین فرانسا بؤلمهسی بیرینجی ساواشدان سونرا قورولموشدور. بو قورومون ایلک باشقانی اونلو فرانسیز یازاری آناتول فرانس، اوندان سونرا دا اونلو دوشونور، قوشوقچو پاول والئری اولموشدور. بوگون ایسه آدی چکیلن قورومون باشقانی سیلوئستر كلانسير بَيلریدیر.
آیریجا P. E. N كلوب اینتئرنشنالین بیر نئچه کومیتهسی ده بولونماقدادیر. اؤزللیکله "توستاق یازارلار کومیتهسی" اولوسلارآراسی باسقییا اوغرایان، توستاقلانان یازارلاری ساوونماقلا گؤرولی اولاراق، اونلارین سسینی دونیا قامویونا یئتیرمهیه چالیشیر.
گوناذپورت: كلوب يئتكيليلري ايله گرچكلشن گؤروشمه لرينيزده دوستاقدا اولان هانسي يازار، شاعير و قزئته چيلريميز حاقيندا بيلگيلر وئريلميشدير؟
سولئيمان اوغلو: P. E. N كلوب اینتئرنشنالین فرانسا بؤلمهسی ایله ایکی گؤروشوم اولموشدور. ایلک گؤروش ایکی مین اونونجو ایلین آلتینجی آیینین اوچونده، كلوبون مرکزینده گرچکلشدی. بو گؤروشده كلوبون بیر چوخ اویهلری ده بولونماقدا ایدی. كلوب باشقانی نین یولچولوقدا اولدوغو ندنیيله گئنل یازمان (گئنل سئکرئتئر) سایین فیلیپ پاژاس ایله باش یازمان یاردیمجیسی سایین نیكولا باریئر ایله بیرلیکده گونئي آذربایجانین دیلسل، ائکینسل (کولتورل) سورونلاری اله آلینیب تارتیشیلدی. اولدوقجا ایلگینج بو قونوشما، تارتیشمالار سونوجوندا سایین فیلیپ پاژاس منه گونئی آذربایجان دیلی ایله بو دیلی قونوشانلارین گونئیده ساییسی اوزره بیر یازی یازماغیمی اؤنردی. بو یازی یئنی قورولموش (اوچ ایلدن بری) "دیل ایله چئویری کومیتهسی" - نجه بارسئلونادا دوزنلنهجک اولوسلارآراسی دیل توپلانتیسینا سونولاجاقدیر.
توتساق یازارلاریمیزا گلینجه، اولدوقجا قاپساملی، گئنیش بیلگیلر سوندوم. اؤزللیکله ایلک گؤروشومده اکبر آزاد، سعید متین پور، رحیم غلامی بَیلری اوزرینه دوردوم. آیریجا یازدیغیمیز آچیق بیتیک كلوب اویهلرینه وئریلدی...
ایکینجی گؤروشوموز آیین اونوندا بیر قوشوق آخشامیندا گئرچکلشدی. پئن كلوبون قوناغی اولان ایسپانیول یازار، دیلچی، قوشوقچو ژوسه ماریا پاز قاقو- یا آیریلمیش آخشامدا گئنل یازمان فیلیپ پاژاس سؤزلرینه گونئی آذربایجان توتساق یازارلارینی آناراق باشلادی. سایین پاژاس بَیلری ایراندا فارس اولمایان دیللرین یاساق اولدوغونو بیلدیررک اکبر آزاد، سعید متین پور، رحیم غلامی کیمیلرینی یالنیزجا آنا دیللرینی یازیب اوخوماق ایستدیکلریندن دولایی توتساقلانیر، ایشکنجه اولونور، یازیلاری، بیلگی سایارلاری، کیشیسل نسنهلری ... اؤزل پولیسجه یاغیجاسینا تالان اولونور، دئدی.
"بیز یالنیزجا گونئی آذربایجاندا دئییل ده بوتون اؤلکهلرده یازارلارا قارشی یورودولن باسقیلاری قیناییب "توتساق یازارلار کومیتهسی" آراجیلیغییلا اونلارین سسلرینی اولوسلارآراسی قامویونا یئتیرمه یی اؤز اؤده ویمیز ساییریق. بیزیم گونئی آذربایجانلی یؤووشداشلاریمیزین (قلمداشلاریمیز) تئزلیکله اؤزگورلویه بوراخیلمالارینی دیلریم."
باش یازمان سؤزونو قاتیلیمجیلارین گورولتولو آلقیشلارییلا بیتیردی. ژوسه ماریا پاز قاقو - ون اوخودوغو قوشوقلاریندان سونرا یئمک ماساسیندا دا من گونئی آذربایجان یازارلارینین یاشادیقلاری دوروم اورتامی آچیقلاماغا چالیشدیم. سایین باش یازمان فیلیپ پاژاس بَیلری اکبر آزادین قیسا بیر هؤروتونون (متنینین) فرانسیزجا چئویریسینی ایستهدی. اکبر بَیلرینین الده بولونان اسکی بیر هؤروتونو سایین یازار، دیلچی ژان قامونئت ایله بیرلیکده فرانسیزجایا چئویریب، كلوب یئتکیلرینه سوندوق. آیریجا پئن كلوبا یازدیغیم اوچ آچیق بیتیکده باشقا یازارلاریمیزین دا آدینی چکدیم:
ماحمود فضلی بَیلری، حیدر کریمی بَیلری، ایبراهیم رشیدی بَیلری. بورادا بیلگی قیسیتلیغی ندنیله باشقا توتوقلانان یازارلاریمیزدان گئنل اولاراق دانیشدیم. اونا گؤره ده بورادا گونازپورت آراجیلیغییلا اونلاردان عوذور دیله ییر، اؤزللیکله توتساقلانان مودئرن یازاریمیز، "لاچین" درگیسینین باش یازاری سایین رامین جبارلی بَیلرینین آدینی چکمک ایسته يیرم.
گوناذپورت: اولوسلارآراسي يازارلار درنه يينين يئتكيليلري گونئي آذربايجان قزئته چيلر و يازارلارينين توتوقلانماسي مؤوضوعسونا موناسيبتلري نئجه اولموشدور؟
سولئيمان اوغلو: یوخاریدا سؤیلدیگیم اوزره منی اولدوقجا اولوملو (پوزیتیو) قارشیلایاراق یازدیغیم آچیق بیتیکلری بوتون "پئن كلوب اینتئرنشنال بؤلمهلری" - نه اي. مئيل آراجیلیغییلا ایله تدیلر. بونونلا بیرلیکده یازار، قوشوقچو، قزئته چیلریمیزین اؤزگور بوراخیلماسی اوغروندا چالیشاجاقلارینا دا سؤز وئردیلر. آیریجا "آمنئستی اینتئرنشنال" - ین (اولوسلارآراسی گئنل باغیشلاما اؤرگوتونون) "فرانسا بؤلمهسی" - نین صیربیستان اوزره یئتکیلیسی مارتین رویو خانیملاری، یازدیغیم اوچ آچیق بیتیگی بوتون "آمنئستی اینتئرنشنال بؤلمهلرینه گؤندردی. یئری گلمیشکن بورادا سایین یازار، دیلچی ژان قامونئت ایله مارتین رویو خانیملاریندان گؤنولدن تشکور ائدیریک!
گوناذپورت: بيلديييميز كيمي همن درنك و بونا بنزري اولوسلارآراسي درنكلر اوست اوسته فارسلارين نوفوذ داييره سينده اولموش و اونلار اؤز مقصدلري اوغروندا بو درنكلري گئنيش اؤلچوده قوللانميشلار. سيزجه گونئي آذربايجان آيدينلار، يازارلار، شاعيرلر و قزئته چيلري گونئي آذربايجان و ميلي مسئله ميزين دونيايا تانيتديريلماسيندا سؤزو گئدن درنكلردن نئجه بهرلنه بيلرلر؟
سولئيمان اوغلو: چوخ دوغرو، آجیناجاقلی بیر قونویا توخوندونوز. آچیق، سایدام سؤیلمک گرکیرسه، فارسلار اولوسلارآراسی درنک - قوروملاردا گوجلودورلر. آیریجا اونلارین بو درنک - قوروملارا گیرمهلری باشلیجا بیر آماج گودمکدهدیر. او دا ایرانین بیر اولوسلو، بیر توپلوملو، بیر ائکینلی، بیر اویقارلیقلی، بیر دیللی بیر اؤلکه اولدوغونو گؤسترمکدیر. ایستر سولو اولسون، ایسترسه ساغی! منجه گونئی آذربایجانین دیلینی، ائکینینی، یازار، قوشوقچولارینی اولوسلارآراسی قوروم - درنکلره دوغرو دوزگون تانیتدیرماق اوچون یالنیزجا بیر یولوموز واردیر. او دا اؤز اؤزوموزو بیر گونئی آذربایجان تورکو اولاراق تانیییب تانیتدیرماقدیر. سیزه بورادا یالنیزجا یاشادیغیم بیر اؤرنه یی سونورام:
من 2008جی ایلده "پئن كلوب اینتئرنشنال" - ین اویهسی اولماق ایستدیگیم سورهده، بیر چوخ قوشوللار دیشیندا، بیر "ایرانلی سورگون یازار" کیمی اویه اولا بیلجه ییمی ایرهلی سوردولر. من ایسه دیلکچمده (تقاضانامه مده) آذربايجان تورکجهسینده یازان، قوشان بیر گونئی آذربایجانلی اولدوغومو اونلارا یازمیشدیم. آنجاق منی بیر گونئی آذربایجانلی اولاراق دئییل، بیر "ایرانلی" یازار اولاراق اویهلییه آلماق ایسته ییردیلر. "پئن كلوب" اوچون گونئی آذربایجان آدیندا رسمی بیر اؤدوس (دؤولت) اولمادیغندان اؤتورو، منی "ایرانلی" اولاراق اویهلییه آلماق ایسته ییردیلر. بیر ایل بویونجا یازیشما، تارتیشمالاردان سونرا فرانسا پئن كلوبو ساعاتلار بویونجا سورن بیر آچیق اوتورومون سونوجوندا دیرندیگیم اوزره بیر گونئی آذربایجان یازاری کیمی منیم اویه لیگیمی اونایلادی (تصدیق ائتدی). بؤیلهجه من بیر "ایرانلی" دئییل ده، ایلک کز اولاراق گونئی آذربایجان آدینا اویهلییه سئچیلدیم.
بیلیندیگی اوزره "ایران" آدینا بیر چوخ یازار، قوشوقچو پئن كلوبون اویهسیدیرلر. بونلارین آراسیندا من بیلدیگیم ایکی گونئیلی یازار دا بولونماقدادیر. بو ایکی کیشی ایسه نه یازیق فارس دیلینده یازیب قوشان گونئی آذربایجان تورکلریدیرلر. بونلارین آذربایجان دیل ایله ائکینینی مایتالمان (مؤحتشم) اولوسلارآراسی بیر قورومدا ساوينماق (مودافيعه ائتمک) بیر یانا دورسون، گونئی آذربایجان آدینی بیله دیللرینه آلماقدان چکینیرلر. آچیق سؤیلمک گرکیرسه، اونلارین گرچک کیملیکلری فارس - ایران کیملیگی اولموشدور آرتیق. بو یالانچی، بوش کیملیکله کندی اؤزلرینی تانیملاییرلار. آذربایجان تورکلرینی "قوم"، دیلینی ایسه "لهجه" آدلاندیران، سؤزده "یازار – قوشوقچولار" دوغال اولاراق، گونئی آذربایجان توتساق یازار - قوشوقچولارینی دا ساوینماق ایستمزلر، ساوینانلارین اؤنونه بیله داش آتماقدان چکینمزلر.
سونوج اولاراق کندی اؤز وارلیغیمیزی منیمسه ییب اؤزومسمهدن، دوغرو کیملیگیمیزی یانسیدان دیلیمیزی فلسفه جه گلیشدیریب یوکسلتمهدن سورکلی باشقالارینین دوشونسل کؤلهسی اولاراق کیشی اوغلونا یاراشمایان آلچاقجاسینا بیر یاشام بیچیمینی سورمک زورونداییق. اونوتمایالیم:
گونئی آذربایجان تورکونو دوشونسل کؤلهلیکدن قورتاراجاق یالنیزجا بیر ائتمن (فاکتور) واردیر، او دا اونون مودئرن دیلیدیر. نیتکیم (زيرا) گرچک بیر اولوسون اؤزوتو (روحو)، تینی (اسپریسی، نفسی)، دوشونجهسی، گلجه یی ... اونون دیلیدیر.
گوناذپورت: بو دانيشيغا واخت آييرديغينيز اوچون سيزه تشكورلريميزي بيلديريريك
سولئيمان اوغلو: ساغ اولون
هیچ نظری موجود نیست:
ارسال یک نظر