زامان اوغلو «بابک حبیبی نوروزلو» 1982جی میلادی ایلین بیرینجی آینین 30- دا (30/01/1982) گونئی آذربایجانین قاراداغ ماحالینین «گرمهدوز» بؤلگهسینده، آراز قیراغیندا «چلبیان» ائلینین «نوروزلو» (حسرهتان) کندینده دونیایا گؤز آچدی.
تمل، اورتا و یوکسک اؤیرتیم دؤرهلرینی اؤز دوغما کندینده بیتیریب، «يونیوئرسیته اؤنجهسی (پیشدانشگاهی)» دؤرهسینی ایسه قونشو کند «لارجان» - دا اوخویوب، بیتیردی. 1380جی ایلینده تئهران «ایمام علی افسرلیك يونیوئرسیتهسی»نده (اوردو يونیوئرسیتهسی) «سیستئم موهندیسلیيی – صنعت موهندیسلیيی (مهندسی سیستم – مهندسی صنایع)» ساحهسینده قبول اولوب، اورادا لیسانس سوییه سینده و دؤرهسینده اؤیرتیلمهیه باشلادی. میلی دویغولارینان، وطن حسرتیلن (آراز قیراغیندا اولدوغونا گؤره و قاراباغ ساواشینا یاخیندان شاهید اولدوغونا گؤره وطنپرورلیک دویغوسو اوندا یوکسک بیچیمده اولوشموشدو) بو يونیوئرسیتهیه چیخاندان سونرا دا اؤز مدنی فعالیتلریندن ال چکمدی کی هئچ، یئنی فازدا و یئنی نورملارلا اؤز فعالیتلرینه داوام ائتدی.
تئهران تورک اؤیرنجیسل درگیلریندن اولان «یول»، «اردم»، «آذربایجان ایقتصادی» و ... درگیلرله امکداشلیق ائدیب، بیلیم یوردون «پیروان ولایت» آدلی درگیسنین باش کاتیبی و سوروملو مودورو (یؤنهتیجیسی) اولدو (آراشدیرما موعاوینتی؛ «تیمسار خورشیدی»نین ایصراریله بو گؤروی قبول ائتمیشدی، آنجاق، درگینین آدینا گؤره اورادا چالیشماق ایستهمیردی). او ایران ایسلام جومهوریتینین دنیز قووهسی نوشهرده اولان ایمام خومینی يونیورسیتهسینین درگیسینده بیر تورکی بؤلوم آییراراق اورادا دا فعالیت گؤستردی. 1383جي ایلینده، آتا بابکین دوغوم گونو (10/04/1383) يونیوئرسیتهنین «صیاد شیرازی تالاری»- ندا 1200 تورک (دوغو و باتی آذربایجان، زنجان، اردبیل، قزوین، همدان، اراک، تهران، و قوم تورکلری ایله برابر تورکمن، قاشقای، بختیاری و…) افسرلیک اؤیرنجیلرینین امکداشلیغی و ایشتیراکیله بیر طنطنه لی تؤرن قوردو. تورک ادبیات کیلاسی گیزلیجه 4 ترم بو اونیوئرسیته ده، بابکین چالیشمالارینین سونوجو اولاراق قورولماقدایدی. اورادا یالنیز تورک دیلی یوخ، بلکه میلی حرکتدن و باتی آذربایجاندا اولان کورد تهلوکهسینه گؤره آذربایجان اوردو افسرلرینه آچیقلامالار گئدیردی کی بیر داها قاراباغ فاجيعهسی کیمی بیر فاجيعه گونئی آذربایجاندا دا باشیمیزا گلمهسین!
1384- ون بهمن آییندا اؤیرتیم سورهجینی ایمام علی افسرلیك يونیوئرسیتهسینده بیتیریب، سونرا بیر تؤرنده بوتون تئهران بیلیم یوردلارینين تورک اؤیرنجیلریني چاغیراراق، بیر اؤیرنجیسل گزینتيده تئهرانین چیتگر داغلاریندا اؤز سیلاحداشلارینان اؤیرتیم بیتیرمهلرینی قوتلادیلار. بو تؤرندن سونرا، ایلک دؤنه اولاراق ایطیلاعات طرفیندن توتوقلانیب، 3 گون سورغو- سوالدان سونرا مشروط اولاراق اوندان تعهد آلیب، بوراخدیلار. يونیوئرسیته اؤیرتیملرین بیتیرندن سونرا ایطیلاعات رستهسین سئچیب، قبول اولدو. آما، حیفاظت ایطیلاعات اونون صلاحیتین قبول ائتمهییب، ایجباری اولاراق اونو "پیاده" (پیاده) رستهسینده کامانداليق دؤرهسینی کئچیرمک اوچون شیراز شهرینه گؤندردی. بابک بي یئنه ده سارسیلماییب، اورادا دا اؤز چالیشمالاری و چابالاری ایله بیرینجیلیگی قازانیب، تئهران «65 نوهد اؤزل هوابرد قووهلر تیپینه» (یاشیل بؤرکلولر تیپینه) سئچیلدی. خاطیرلاماق لازیمدیر کی بو تیپه یالنیز 3 کیشی سئچیله بیلردی کی بابک بَی بو اوچ کیشینین بیرینجیسی اولموشدو.
میلی روحونا گؤره، آذربایجانین باشکندی تبریزی اؤز فعالیتلرینه یاخشی بیر اورتام گؤروب، یاشیل بؤرکلولر تیپیندن آیریلیب، تبریزده 21 آذربایجان لشکرینه (آرتش اوردوسونا) اینتیقال آلدی. آذربایجان لشکرینده تکآور قوردانیندا ادوات قوروهانیندا تانیتیم (شناسایی) دستهنین کامانداليق و کاماندئر یاردیمجیسی و 3جو قوروهانین کاماندئر اولدو، آما، هئچ زامان کاماندئر حوقوقی (مزایاسی)، حیفاظت ایطیلاعاتین موخالیفتینه گؤره اونا وئریلمهدی. بیر آز زامان ایچینده ایران قوزئی - باتی اوردوسو ایچینده نومونه و اؤزل کاماندئر (فرمانده) سئچیلدی.
بابک بَی، 4 ایل افسری اونیوئرسیتهسینده، بیر ایل شیراز کاماندورلوق و ایکی ایله یاخین کاماندورلوق (فرمانده) دؤرونده اؤنملی بیلگیسل و نیظامی روتبهلر قازاندی.
بو گنج افسرین تورکه و آذربایجانا اساسلانان میلی دوشونجهسینه و آذربایجانین میلی چاباچیلار و چالیشقانلیلاری ایله ایلگیسی اولدوغونا گؤره و اوردودا تورک دیلینده اؤیرهتیم و تورک دیلینده دانیشیقلارینا گؤره، آذربایجان میلی مراسیملرینده او جومله دن میلی سردار ستارخان، باقيرخان مزاریندان کئچیریلن مراسیم،21 آذر آغيرلاما توؤرنی(ایمام علی يونیورسیته سینده)، دونیا آنادیلی گونونده تورکجه عسگرلری تبریک دئمه سی، بابک قالاسنا (بابک دوغوم گونو عرفه سینده) گئتمه سی و... حیفاظت ایطیلاعات جانا گلیب، سونوندا «بابک»ی 26/02/1387 گونونده ایرانین دوغو سينيرينا سورگون ائتدی. او بو حاقسیزلیغا دؤزمهییب، بو سورگونولویه جیدی بیچیمده اعتيراض ائدرک، بو سورگونلویه باش ایمهیهجهیینی، اورایا گئتمهیهجهیینی آچیقجاسینا حیفاظت ایطیلاعاتین ایشچیلرینین قولاغینا چاتدیردی.
بو اعتيراضلاردان سونرا، آذربایجان گنج افسرینی، اوردودان ائشییه آتدیلار و 26/09/87 تبریز نیظامی محکمهسینده اونو «پان تورکیست، بؤلوجو، و نیظاما قارشی دوران اؤرگوتلرله ایلگیلنمه» تؤهمتلرینه اساسلاناراق «آلتی آی تعزیری حبس یئرینه اوچ ایل مودتینده تعلیقی حبس» جزاسی وئریلدی.( اونا وورولان بیر نئچه اتیهاملار: بیر خورداد قیامنا سازمان ورمک، میلی فعاللارنان (تجزیه طلبلرله) گئت گل ائتمک، آذربایجان درگیلریلن ایش بیرلیگی اپارماق، پادقاندا آذربایجان میلی مراسیم کئچیرمک، ساوالان تورک داغچیلار توپلومونو تشکیل ائتمک، آدينی قیاس - دان بابک - ه چئویرمک، حيفاظت ایطلاعات بلگه لرینده اوز میلیتینی تورک یازماق و...). ایندی بابک بَیین دیپورت اولدوغوندان ایکی ایله یاخین کئچیر. آما، بو گونه قدر اونون رسمی شکیلده ایخراج حؤکمونو وئرمهییبلر. خاطیرلاتماق لازیمدیر کی، بابک - ین بئش ایله قدر اؤلکهدن چیخماق حاقی آلینیب. دئمک، گؤزلهییرلر کی اوندان دن بیر خطا اوز وئرسین و اونو عادی محکمهده یوخ، بلکه، نیظامی محکمهده سورغو-سوالا چکیب، محکوم ائتسینلر!
هیچ نظری موجود نیست:
ارسال یک نظر